D’Julie an den Aprikosejong

Cosimo Suglia / Daliah Kentges

D’Julie ass e klengt Meedche mat enger grousser Leidenschaft fir eng ganz bestëmmte Fruucht: séiss, säfteg a samteg Aprikosen. Am Bësch, net wäit ewech vu sengem Doheem, sou heescht et, steet e ganz besonneschen Aprikosebam, dee gréisste vu senger Zort, mat deene beschten a schéinste Friichten, déi jee ee Mënsch gesinn huet.
Säi Papp awer huet dem Julie strengstens verbueden, an dëse Bësch ze goen, well, sou erzielen sech d’Duerfbewunner säit Joerhonnerten, der Doud do lauert.
Mee well d’Julie gewinnt ass, dat ze kréien, wat et wëll, a well seng onmoosseg Gloscht him keen anere Choix léisst, schläicht hat sech enges Nuets heemlech eraus, fir dës eenzegaarteg Këstlechkeet ze schmaachen. An tatsächlech, déif am Bësch verstoppt, fënnt d’Julie e risege Bam, mat Aprikosen sou grouss wéi Melounen. Hatt hat also, sou seet et sech, wéi ëmmer Recht. An et huet dëse Gedanken nach net richteg zu Enn geduecht, wéi et op eemol am Gebësch raschelt an e wonnerbaart klengt Wiesen ervir kënnt, dat dem Julie seng Virstellungskraaft bei wäitem iwwertrëfft…
Ausgoend vu senger Kuerzgeschicht The Little Girl That Knew Better, (Les Cahiers Luxembourgeois Numéro 3, 2020) entwéckelt de Cosimo Suglia, deen 2021 mam Chrysalis Award, e Präis fir Nowuessschrëftsteller a spekulativer Fiktioun, fir Lëtzebuerg ausgezeechent gouf, zesumme mam Daliah Kentges en Theaterstéck fir Kanner ab sechs Joer.

Zousätzlech Informatiounen

• Text: Cosimo Suglia
• Regie: Daliah Kentges
• Assistenz: Laetitia Lang
• Bün a Kostüm: Anouk Schiltz
• Musek: Arthur Possing
• Theaterpedagogeschen Dossier: Laetitia Lang
• Mam: Mady Durrer (Erzielerin a Bam), Magaly Teixeira (Julie), Luc Lamesch (Aprikosejong)
• Produktioun: Théâtre du Centaure
• Koproduktioun: Kulturhaus Niederanven a Kinneksbond Centre Culturel Mamer
• Ënnerstëtzung: Ministère de la Culture a Ville de Luxembourg
• Award: Gewënner vum Bünepräiss 2025 an der Kategorie „Bescht Kanner- a Jugendtheaterproduktioun“
• Alter: vu 6 Joer un
• Dauer: 60 Minutten
• Sprooch: Lëtzebuergesch